Villacosta Club 25 - Efsta hæð

Íbúðin er á 3. hæð í Villacosta Club í göngufæri frá La Fuente kjarnanum þar sem finna má marga veitingastaði, bari, apótek, kínabúð o.fl.  Við íbúðina er góður sameiginlegur sundlaugagarður með sundlaug, nuddpotti og góðri aðstöðu til sólbaða. Stutt frá nokkrum golfvöllum svo sem Campoamor, Villamartin og Las Ramblas, tilvalið fyrir golfara.

Íbúðin er björt og falleg penthouse íbúð með útgengi út á mjög stórar svalir (150 fm),úr svefnherbergjum, stofu og borðstofu. Þaðan er gengið upp á 86 fm þakverönd með borði, stólum, sólbekkjum, stórri pergolu og þvottavél í lokuðum skáp, útiljós í tröppum og á þakveröndinni, þaðan er glæsilegt útsýni til allra átta og til sjávar.

Í stofunni er góður tungusófi sem einnig er svefnsófi, tungan er með geymslurými fyrir sængur o.fl, dýnan í svefnsófanum er 120x200 cm, góð dýna. Snjallsjónvarp, Apple Tv, afruglari með spænskum og enskum rásum, WiFi, loftkæling, borðstofuborð með stólum, skrifborð með tölvuskjá, lyklaborði og mús. Eldhúsið er bjart og vel búið tækjum og búnaði.

Gengið er út úr stofunni á svalir með fallegum útihúsgögnum, borði, stólum, sófa, hægindastólum og fallegum sólbekkjum, mótorknúnar markísur og stór pergola. Geymslukassar fyrir pullur og dýnur. Glæsilegt útsýni til sjávar. Útiljós á svölunum.

Aðgangur að bílastæði í bílakjallara fylgir íbúðinni.

Svefnherbergin eru tvö
Íbúðin er með tveimur svefnherbergjum og einnig er svefnsófi í stofunni, gistirými er því fyrir 4-6 gesti. Hjónaherbergið er með hjónarúm 180x200 cm, vönduð dýna, náttborð með þremur skúffum, rúmgóður fataskápur með speglahurðum, inn af hjónaherberginu er rúmgott baðherbergi með sturtuklefa. Gestaherbergið er með tveimur rúmum 90x200 cm, vandaðar dýnur, má setja saman í eitt rúm, náttborð með þremur skúffum, rúmgóður fataskápur með speglahurðum. Bæði svefnherbergin eru með loftkælingu. Sængur og koddar ásamt rúmfötum eru í íbúðinni.

Baðherbergin eru tvö
Tvö falleg baðherbergi eru í íbúðinni, annað er innaf hjónaherbergi. Þau eru bæði rúmgóð með salerni, vaski, sturtu og innréttingu, hárblásari og sléttujárn til staðar. Baðhandklæði og þvottastykki fylgja leigu, einnig fylgja handklæði til nota á sólbekkina.